Украинската противвоздушна одбрана соопшти дека пресретнала руска хиперсонична ракета „3M22 Циркон“ над Киев, пренесоа денеска украинските медиуми на социјалните мрежи.
Украинската војска наведува дека и претходно соборила една од овие ракети, но за првпат е објавено видео на кое е прикажано тоа пресретнување.
Ракетата „3M22 Циркон“ (НАТО ознака SS-N-33) е еден од трите хиперсонични проектили за кои Русија тврди дека е практично невозможно да се пресретнат.
Додека „Цирконот“ може да достигне голема брзина во фазата на крстарење, таа брзина може да биде помала во завршната фаза, што ја прави ракетата ранлива на модерните системи за противракетна одбрана, како што се „Patriot“ или европскиот систем „SAMP/T“.
Украинската војска наведе дека патеката на ракетата е попредвидлива отколку што беше најавено, и покрај руските тврдења за нејзината брза промена на насоката и брзината.