Премиерот на Гренланд, Јенс-Фредерик Нилсен, изјави денеска дека постојат црвени линии што не смее да се преминат во разговорите со Соединетите Американски Држави, но истовремено призна дека е потребно да се направи повеќе за зајакнување на безбедноста во регионот поради сè поагресивното однесување на Русија.
Нилсен и данската премиерка Мете Фредериксен престојуваа во Париз на средба со францускиот претседател Емануел Макрон со цел да ја зацврстат поддршката по изјавите на американскиот претседател Доналд Трамп дека сака да ја преземе контролата врз овој арктички остров, кој со векови е данска територија.
Се очекува да се одржат разговори меѓу Гренланд, Данска и САД за надминување на кризата, но Нилсен истакна дека Гренланд има одредени граници што не може да се преминат, иако изрази надеж дека ќе се постигне некаков договор. Тој не изнесе дополнителни детали.
– Под притисок сме, под сериозен притисок. Се обидуваме да се спротивставиме и да се справиме со стравот на нашите луѓе – рече Нилсен на јавна трибина со Фредериксен на Универзитетот Sciences Po додавајќи дека „мора да се воведат поголем надзор и поголема безбедност во нашиот регион поради начинот на кој Русија се однесува“.
Барањето на САД за контрола над Гренланд ги потресе трансатлантските односи и ги забрза европските напори за намалување на зависноста од САД, иако Трамп минатата недела ги повлече заканите со царини и ја исклучи можноста за преземање на Гренланд со сила.
Фредериксен изјави дека кризата покажала оти поголемиот дел од Европејците се на иста страна и дека успеале да се обединат во спротивставувањето на барањата на Трамп, особено на заканите со дополнителни царини за европските земји.
Истакнувајќи дека светскиот поредок е трајно променет и изразувајќи загриженост за идните потези на Вашингтон, таа нагласи дека е клучно Европа да стане посилна, но истовремено повика на трансатлантско единство имајќи предвид дека Русија, според неа, не сака мир.
– Ако ѝ дозволиме на Русија да победи во Украина, таа ќе продолжи понатаму – рече Фредериксен. „Најдобриот пат за САД и Европа е да останат заедно“.
Дипломатскиот раздор меѓу Данска и САД, двете основачки членки на НАТО, во последните недели се сметаше за потенцијална закана за иднината на алијансата, иако конфликтот оттогаш се префрли на дипломатско поле.
Половина од копнената површина на Арктикот е под руска територија. Од 2005 година Москва повторно отвори и модернизира десетици воени бази од советската ера како на арктичкото копно така и на островите по должината на северниот брег.
Русија ги оцени разговорите за наводни закани од Москва и Пекинг кон Гренланд како мит што служи за поттикнување хистерија.