Норвешка ги предупреди своите граѓани дека армијата ќе може да конфискува приватни куќи и автомобили во случај на војна со Русија.
Воените претставници изјавија дека околу 13.500 писма биле испратени до Норвежаните со предупредување дека одредени средства можеби ќе треба да се конфискуваат – вклучувајќи недвижен имот, возила, чамци и машини, објави Дејли меил.
„Реквизициите имаат за цел да обезбедат, во воени услови, вооружените сили да имаат пристап до ресурсите потребни за одбрана на земјата“, соопшти норвешката војска.
Ваквата мерка би имала важност од една година, а Норвежаните добиле слични писма и во претходните години.
„Важноста од подготвеноста за криза и за војна драматично се зголеми во последните години“, рече Андерс Јернберг, раководител на организацијата за воена логистика.
„Норвешка е во најсериозна безбедносно-политичка ситуација од Втората светска војна. Нашето општество мора да биде подготвено за безбедносни кризи, а во најлош случај и за војна… преземаме значително зајакнување на воената и цивилната подготвеност“, додаде тој. (МИА)