Цивилната одбрана на Појасот Газа вечерва објави дека најмалку 25 лица се убиени во израелско гранатирање низ целата територија, додека израелските власти соопштија дека извршиле напади врз членови на палестинското движење Хамас затоа што нападнале израелски војници и го прекршиле прекинот на огнот.
Во израелските напади загинаа 12 лица во градот Газа, вклучувајќи еден пар и нивните три деца, според Цивилната одбрана, организација за прва помош што работи под власта на Хамас.
Нејзиниот портпарол, Махмуд Басал, се појави во видео на кое се прикажани телата на три мали деца во чаршафи.
Басал, исто така, објави 10 смртни случаи во областа Кан Јунис (јужен Појас Газа), вклучувајќи две малолетни лица чии возрасти не ги прецизираше.
Израелската војска претходно денеска обвини „неколку терористи дека отвориле оган во текот на денот во насока на област каде што нејзините војници дејствуваат во Кан Јунис“.
Нападите не предизвикаа жртви или повредени, но претставуваа „кршење на договорот за прекин на огнот“, соопшти израелската армија во соопштението, додавајќи дека дејствувала како одговор на „нападите врз терористичките цели на Хамас низ Појасот Газа“. (МИА)