Рускиот министер за надворешни работи Сергеј Лавров денеска изјави дека постојат обиди нацизмот да се направи „прифатлив“ во Европа.
На церемонијата на положување цвеќе на спомен-плочи на ветераните на руското Министерство за надворешни работи по повод Денот на дипломатскиот работник, Лавров ја нагласи важноста на зачувувањето на сеќавањето на борбата против нацизмот со цел да се спречи неговото оживување во која било форма или манифестација.
Оваа година се одбележува 80-годишнината од завршувањето на Нирнбершките судења, на кои воените злосторници на Третиот рајх беа осудени за геноцид врз народите на поранешниот Советски Сојуз.
„Ќе продолжиме да работиме за да обезбедиме одлуките на Нирнбершкиот трибунал да останат неповредливи и злосторствата што беа осудени засекогаш, никогаш да не се повторат никаде – ниту во Украина ниту во други делови од Европа“, нагласи Лавров.
Лавров вчера изјави дека „нацистичките темели“ во Украина мора да бидат отстранети како услов за обезбедување на безбедноста на Руската Федерација.