Израелските одбранбени сили (ИДФ) соопштија дека зазеле база на исламистичкиот Хамас по жестоки борби во северниот дел на Појасот Газа.
Базата се наоѓа во бегалскиот камп Џабалија, соопшти ИДФ, додавајќи дека во десетчасовната битка биле вклучени и милитанти на Исламскиот џихад.
Израелските копнени трупи „убија терористи во Џабалија, запленија многу оружје и открија шахти од тунел“, соопшти ИДФ.
Една од тунелските шахти се наоѓала веднаш до градинка и водела до обемен подземен тунелски систем. Во базата е пронајден и „важен оперативен материјал поврзан со оперативните планови на непријателот“, соопшти ИДФ.
Според Израел, военото и политичкото раководство на Хамас се крие во системот на подземни тунели во Газа. Некои од 239-те заложници киднапирани од Хамас за време на масакрот во Израел на 7 октомври, исто така, се смета дека се чуваат во системот на тунели.
Минатата недела израелски воздушен напад врз зграда во Џабалија предизвика огромно уништување, оставајќи огромен кратер во бегалскиот камп. Палестинските власти известија за десетици убиени.
ИДФ соопшти дека еден од организаторите на масакрот на 7 октомври и 50 други милитанти биле убиени во нападот врз Џабалија.
Според ОН, Џабалија е најголемиот од осумте бегалски кампови во Појасот Газа. (МИА)