На официјална церемонија, со највисоки државни и воени почести, претседателката Гордана Сиљановска-Давкова го пречека црногорскиот претседател Јаков Милатовиќ.
По тет-а-тет средбата, се одржа пленарен состанок на македонската и на црногорската делегација.
Предмет на разговорите беа македонско-црногорските политички односи, економската соработка, образованието, дигитализацијата, културата и туризмот, но и регионалните, европските и меѓународните настани и состојби.
Сиљановска-Давкова и Милатовиќ споделија видувања за евроинтеграциите во коишто Црна Гора е водечка земја-кандидат, а македонскиот пат е блокиран со условување со уште една од низата уставни измени, иницирани однадвор.
Според нив, интензивните реформи, во духот на Копенхашките критериуми го европеизираат регионот, а пошироката трговска соработка и инфраструктура ја зајакнуваат неговата улога во европски рамки.
🇲🇰 🇲🇪 Ми беше чест да го пречекам претседателот на Црна Гора, Јаков Милатовиќ, кој престојува во официјална посета….
Posted by Gordana Siljanovska Davkova on Tuesday, March 31, 2026
Претседателите уште еднаш укажуваат на нужноста од брза реинтеграција на регионот на Западен Балкан во Европската Унија, со оглед на високите безбедносни ризици, предизвикани од актуелните војни.
Посебно значење за Милатовиќ и Сиљановска-Давкова има потпишувањето на Меморандумот за соработка меѓу младинските совети при Кабинетите на двајцата претседатели, како важен чекор во комуникацијата на највиталните, најкреативните, најреформските и најевропските човечки ресурси – младите!