Министерството за надворешни работи и Пошта на Република Северна Македонија денеска промовираа пригодна поштенска марка со мото „За луѓето се работи“ по повод претседавањето на Република Северна Македонија со ОБСЕ 2023 и претстојниот Министерски состанок на ОБСЕ во Скопје.
Автор на дизајнот на поштенската марка е Александар Јосифовски и е испечатена во тираж од две илјади примероци со номинална вредност од 100 денари.
Ја промовираа министерот за надворешни работи и претседавач со ОБСЕ Бујар Османи и директорката на Пошта, Бујаре Абази, во СЦ „Борис Трајковски“ каде што на 30 ноември – 1 декември ќе се одржува состанокот на ОБСЕ.
Примероци од пригодната поштенска марка први добија претседателот на државава Стево Пендаровски и амбасадори на други земји во земјава.
-За сеќавањето од Претседавањето со ОБСЕ да биде трајно, се погриживме и преку издавање на посебно издание на свечена поштенска марка. Оваа поштенска марка ќе биде редок пример во филателистичките колекции ширум светот и ќе остане да сведочи на едно време на значаен напредок на државата на меѓународен план, истакна Османи на промоцијата.
„За луѓето се работи“, рече, беше нашето мото и поттик во текот на изминатата година.
-Нашето Претседавање беше фокусирано на луѓето затоа што во свет во превирања, потребите и барањата на луѓето се секогаш на прво место. Оваа порака е аплицирана и на пригодната поштенска марка затоа што таа треба постојано да ги потсетува политичките лидери и меѓународните организации што е всушност целта на нивната работа, додаде Османи.
Директорката на Пошта на Северна Македонија, Бујаре Абази, истакна дека преку поштенската марка не само што се претставува земјата, туку се испраќа и силна порака.
-Подадената рака, хуманоста и заштитата на луѓето не познава граници и треба да биде во фокус на нашата работа, рече Абази.