Редакцијата на КУРИР нема да присуствува на прес-конференцијата на адвокатот на Васил Јованов, Сашо Дукоски и вознемирувачкото видео нема да го објавиме.
КУРИР го почитува апелот од сестрата на загинатата Фросина и во оваа семејна трагедија нашите мисли и сочувство се со нејзиното семејство.
Сестрата на Фросина најави дека денес на прес-конференција, адвокатот на убиецот ќе прикаже вознемирувачко видео направено веднаш по трагедијата. Семејството Кулаков јавно апелираше до медиумите да не го објавуваат видеото.
АПЕЛ ДО СИТЕ МЕДИУМИ, ИНСТИТУЦИИ И ЦЕЛАТА ЈАВНОСТ
-Добивме дојава дека адвокатот на Васил, Сашо Дукоски на утрешната пресконференција има во план да прикаже видео во кое Васо вришти над мртвото тело на мојата сестра! Познавајќи го неговото минато и адвокатски стил, јасна е целта на Дукоски: да го очовечи убиецот на сестра ми. Да покаже како вришти затоа што му е жал за Фросина, а тој всушност вришти затоа што знае што следи и што го чека него! Вришти затоа што знае што го чека со оглед на неговото криминално минато. Испраќам апел до сите медиуми видеото да не биде објавено, прво од почит кон починатата, а потоа и кон семејството како и кон целата јавност што е веќе доволно згрозена од оваа трагедија. Па не ли беше доволно хорор, напиша сестрата на Фросина.