Јакнење на билатералната соработка, со фокус на одржливата енергија, еколошките технологии и инфраструктурните проекти, биле теми на средбата на министерката за енергетика, рударство и минерални суровини Сања Божиновска со амбасадорката на Јапонија во земјава, Сецуко Кавахара.
Како што соопшти Министерство за енергетика, рударство и минерални суровини, Јапонија е долгогодишен партнер на Македонија и значаен поддржувач на зелени иницијативи, модернизација на енергетскиот сектор и заштита на животната средина.
Министерката Божиновска истакнала дека искуството на Јапонија во развојот на чисти технологии и енергетска ефикасност е од особено значење за Македонија во нејзиниот процес на енергетска транзиција.
-Јапонија е земја која е синоним за иновации и одржлив развој. Визијата за чиста енергија и ефикасно користење на ресурсите е нешто кон што тежнееме и во Македонија. Верувам дека преку партнерство можеме да ги зајакнеме капацитетите во обновливите извори на енергија и да воведеме напредни технологии кои ќе ја направат нашата енергетска иднина поодржлива, посочила министерката Божиновска.
Амбасадорката Кавахара ја потврдила посветеноста на Јапонија кон поддршката на проекти во Македонија кои имаат за цел енергетска ефикасност, заштита на животната средина и развој на технолошки решенија за подобра одржливост.
На средбата, како што е наведено во соопштението, била нагласена потребата од продлабочување на соработката преку нови заеднички иницијативи и програми кои ќе придонесат кон модернизација на енергетскиот сектор и создавање на почиста животна средина во Македонија.