По триумфот над Романците (24-23), пред јавноста се обрати првиот човек на Ракометната федерација на Македонија (РФМ), Александар Стефанов.
„Мора и треба да бидеме задоволни со тоа што го прикажавме во Данска на ова Европско првенство. Дојдовме како аутсајдери според сите официјални статистики, според букмејкерите.
Докажавме дека можеме и во тоа како силна група покрај светскиот и олимпискиот шампион Данска, како и Португалија која заврши четврта на последното првенство, да извојуваме едно реми и една победа и како една од подобрите третопласирани селекции во сите групи да го завршиме ова првенство и како носители да чекаме поволен ждреб за Светското првенство.
Се уште ништо не е завршено, го чекаме исходот од Данска – Португалија, иако треба чудо за таква победа од над 17 разлика.
Кога ќе го видиме тој исход, ќе ги сумираме впечатоците. Но, ова е една успешна претстава, одиграно машки, храбро, борбено.
Со Романија цел меч имавме резултат, го контролиравме. Дојдовме до важна победа и треба да сме задоволни и како федерација и како национален тим и како држава“, изјави Стефанов.