Женската ракометна репрезентација до 20 години го одигра првиот меч во втората фаза на Светското првенство на кое домаќин е Скопје, а избраничките на селекторот Дарко Јанев можат да жалат што не остварија победа.
Репрезентативките испуштија победа против Португалија и на крајот мораа да се задоволат само со реми од 28:28, што на двете селекции им носи по еден бод во втората група на мундијалот.
Македонските ракометарки не останаа импресионирани од фаворитот и без голем респект влегоа во овој дуел, а навистина штета е што прокоцкаа предност од четири гола во второто полувреме.
Завршницата од мечот им припадна на Португалките и на крајот стигнаа до изедначување од 28:28, па тоа ги остава на првото место во групата 4 во втората фаза.
Сара Стефановска со девет погодоци беше најдобра ракометарка на парркетот, пет погодоци имаше Борјана Коцева, а еден помалку запиша Ива Младеновска.