Македонскиот ракометен шампион Еурофарм Пелистер ја оствари втората победа во европската Лига на шампионите совладувајќи го унгарски ПИК Сегед со 25:24 (11:8).
Вечерашниот успех на битолчани беше најавен во првото полувреме кога пелистерци во првите десет минути од средбата поведоа со 5:0, а предност од пет голови разлика имаа и во 23 минута кога на семафорот пишуваше 10:5. Гостите во првиот дел игра под своите можности и реномето со кое дојдоа во Битола, и во првиот дел успеаја да ја намалат негативата на 11:8.
Вториот дел од средбата почна непосакувано за домашниот тим, гостите во 36 минута израмнија на 12:12, а во 43 минута поведоа со 13:14.
Но благодарение на над 3.500 навивачки грла, како што по средбата изјави Жарко Пешевски, најефикасен ракометар во домашниот тим со 7 постигнати голови, битолчани успеаја да го контролираат резултатот и да поведат со 22:20 на шест минути до крајот на мечот.
Во финишот, благодарение на вештите одбрани на Николче Митревски и со голема желба за победа, Еурофарм Пелистер успеа да го совлада „големиот на хартија“ ПИК Сегед со 25:24.
Со втората победа во европската Лига на шампионите, битолчани го подобрија бодовното салдо и ги зголемија амбициите за прогрес во групата во која вечерва ПСЖ го совлада ГОГ Гудме со 31:28, додека Магдебург беше подобар од Загреб со 27:22.