Сега и официјално, градоначалникот на Општина Битола, Тони Коњановски и првиот човек на Еурофарм Пелистер, Зоран Стерјев, го потпишаа договорот за продолжението на платформата за ракометна Битола.
Откако Советот на општината го изгласа продолжувањето, се пристапи и се потпиша договорот на две години. Според истиот, општината е задолжена да обезбедува по 18 милиони денари или 300.000 евра по сезона, со што е зголемена сумата која претходно беше поставена на 15 милиони. При потпишувањето на договорот, претседателот на клубот Стерјев се заблагодари за поддршката од општината и најави нови успеси на Еурофарм Пелистер.
„После осумнаесет години титулата повторно се врати во најракометниот град во нашата држава. Втората година после освојувањето на титулата успехот го повторивме, бевме конкурентни за сите трофеи во нашата држава, веќе во нашите витрини од поново време ги имаме сите освоени трофеи. Ланската година ја имавме Лигата на шампиони, оваа година повторно сме дел од тоа елитно натпреварување, несомнено мислам дека ќе имаме далеку поголем успех и подобро претставување во ова натпреварување. Кога ќе се направи една ретроспектива треба сите да бидеме задоволни и горди, затоа што ова навистина е еден проект кој заслужува особено внимание и којшто треба да биде прототип на начин на соработка на локалната самоуправа и спортските клубови и приватните спонзори. Беше задоволство да се работи заедно со општината како главен партнер во целата оваа приказна, меѓусебното разбирање е на највисоко ниво и верувам дека тоа така ќе продолжи и во наредните години треба да бидеме сите спремни за уште поголеми успеси од оние кои сега ги постигнавме“, истакна Стерјев, нагласувајќи дека очекуваат добри резултати, затоа што екипата е на задоволително ниво за да понуди нови трофеи за Битола“, изјави првиот човек на клубот Зоран Стерјев.
Освен Стерјев, свое кратко обраќање имаше и градоначалникот Коњановски, кој ги пофали постигнатите успеси на пелистерци.
„Повторно една успешна приказна ја продолжуваме и како што кажа и претседателот ова треба да биде пример за соработка. Нè чека месец септември, исполнет со многу активности, спортски натпревари, започнуваме со натпреварите и во Лигата на шампиони и во првенството. Се надевам дека годините кои следат ќе бидат исполнети со уште поголеми успеси и голема радост на трибините“, рече градоначалникот Коњановски, посакувајќи успешна сезона и заблагодарувајќи им се на РК Еурофарм Пелистер, ракометарите, навивачите, советниците и сите поддржувачи“, изјави градоначалникот Тони Коњановски.