Витомир Трајковски го освои сребрениот медал на Европското првенство за кадети, јуниори и У-21 во Тбилиси, Грузија, откако финалето со Ерменецот Гор Нерсисјан заврши 3-3. Но, правилото прв освоен поен беше против него.
Сепак, ова е голем успех за каратистот на Макпетрол. Тој ја продолжи традицијата на освојување медали од големите натпреварувања, посебно од европските првенства.
Претставникот на скопскиот клуб е единствениот член на македонската репрезентација што на шампионатот се закити со одличје. На меѓународниот собир настапија над 1.100 каратисти од 49 земји.
Трајковски, кој се натпреваруваше во возрасната категорија У-21, се пласира во финалето во тежинската категорија до 84 килограми. Тој освои сребрен медал по нерешениот резултат од 3-3 во финалната борба. Ерменецот Гор Нерсисјан победи со прв земен поен во натпреварот.
Витомир Трајковски претходно извојува четири победи во елиминацискиот дел од првенството. Тој ги оствари следните резултати против: Давиде Лучијани (Италија) 3-2, Мелос Гаши (Албанија) 1-0, Никита Сахвон (неутрален) 6-1. Членот на карате клубот „Макпетрол“ во полуфиналето беше подобар од Салих Халиловиќ (БиХ) со 2-1.