Мик Шумахер потврди дека е во сериозни разговори со Кадилак, новиот тим што ќе се натпреварува во Формула 1 од 2026 година, со кој би можел да оствари враќање во елитното натпреварување по четиригодишно отсуство.
Германскиот возач последен пат возеше во Ф1 за Хаас во 2022 година, а минатата сезона го изгуби и местото како резервен возач во Мерцедес, каде што беше заменет од Валтери Ботас. Во меѓувреме, тој се натпреварува за Алпин во World Endurance Championship.
Кадилак, кој влегува во Формула 1 со поддршка на американскиот гигант Џенерал Моторс, сè уште ги бара двајцата возачи за својата прва сезона во Формула 1. Се вели дека Серхио Перес и Ботас се главни кандидати за двете позиции, но конкуренцијата е силна, а Шумахер сега потврди дека и неговото име е во игра.
„Секако дека преговараме. Комуникацијата досега беше многу позитивна“, изјави Шумахер за Motorsport.com. „Тие веќе ангажираа многу одлични луѓе за проектот. Голема чест е да се биде дел од тие преговори, ова е одлична позиција за мене.“
Шумахер би бил одличен маркетиншки потег за американскиот тим
Шефот на тимот Греам Лоудон, најпознат по тоа што го водеше поранешниот тим на Манор, исто така ги потврди разговорите со Шумахер во подкастот High Performance. „Да, разговараме со Мик“, рече Лоудон со широка насмевка.
Додека многумина сметаа дека шансата на Шумахер во Формула 1 е изгубена засекогаш откако го напушти Хаас, Лоудон има само пофални зборови за него.
„Мик е одличен. Тој е многу симпатичен, навистина ми се допаѓа како личност. Сега го познавам уште подобро. Тој е сè уште млад, но има одредено искуство во Формула 1. Помина доста време, но беше активен и во форма. Навистина го цениме тоа. Тој не е странец за нашиот тим. Тој знае каде сме и имаме многу позитивни работи да кажеме за Мик.“
Кадилак би можело да се одлучи за возач кој носи едно од најпознатите презимиња во историјата на спортот, а враќањето на Шумахер во Ф1 би било еден од главните маркетиншки адути на новиот американски тим.