Во преполната сала на Центарот за култура „АСНОМ“ во Гостивар, под слоганот „Еден патопис, страст, историја“, беше означен крајот на исклучително богатата спортска кариера на македонскиот каратист и четирикратен европски првак Берат Јакупи.
На свеченоста, што се одржа во саботата вечер, присуствуваа истакнати претставници од општествениот и спортскиот живот, кои дојдоа да му оддадат почит на спортистот кој испиша историја во македонското карате.
„Настанот не беше само збогување со татамите, туку и официјализирање на неговиот трансфер во спортската администрација. Јакупи, кој зад себе остава импресивно наследство како четирикратен европски шампион, медитерански првак и освојувач на над 120 меѓународни победи, продолжува со својот ангажман преку значајна и одговорна улога во структурите на Македонскиот олимписки комитет (МОК)“, соопшти МОК.
На присутните и на лауреатот им се обрати претседателот на МОК, Даниел Димевски, кој го говорот ја истакна големината на Јакупи како комплетна личност – врвен спортист, но и иден лидер во спортскиот менаџмент, врачувајќи му притоа признание во името на македонското олимписко движење.
Свеченоста, по повод официјалниот крај на спорската кариера на Јакупи, доби и регионална димензија со присуството на високи гости, меѓу кои на претседателот на Олимпискиот комитет на Косово, Исмет Красниќи, како и поранешниот светски карате првак Енвер Идризи.
„Олимпискиот комитет му посакува на Берат Јакупи истата решителност и успех во неговата нова мисија, уверен дека неговиот победнички дух ќе придонесе за развојот на олимпизмот во земјата“, соопшти МОК.