ТФТ И ОФИЦИЈАЛНО Е ЕСЕНСКИ ШАМПИОН ВО МАКЕДОНИЈА И ПОКРАЈ ПОРАЗОТ НА ГОСТУВАЊЕТО ВО БИТОЛА ОД ПЕЛИСТЕР. Иако ослабени, без еден од најдобрите свои играчи- Страхил Николов, кој поради ситна повреда го пропушти последниот натпревар на гостувањето во Битола, екипата на ТФТ се прикажа во добро светло на едно од најтешките гостувања во нашата лига. Во последните минути ТФТ имаше и шанса за целосен пресврт на натпреварот, кој беше контролиран во целост од домашната екипа, но сепак избраниците на Боро Смилковски немаа сили да го сторат тоа. Најефикасни поединци во составот на ТФТ беа: Давид Хотон 18 поени и 13 скокови, Стојаноски 16, Гринли 15 и Говенс 14 поени.
И покрај овој пораз, екипата на ТФТ е есенски шампион на Македонија, а со тоа и како првопласирана екипа ќе го започне КУП натпреварувањето. По комплетирањето на последното коло познати се и двојките за КУПОТ во Македонија:
(1) КК ТФТ СКОПЈЕ – (8) КК ГОСТИВАР
(2) КК ПЕЛИСТЕР – (7) КК ЧАИР 2030
(3) КК МЗТ СКОПЈЕ АЕРОДРОМ – (6) КК РАБОТНИЧКИ
(4) МКК КУМАНОВО – (5) КК КОЖУВ
Полуфиналните двојки се победниците од:
(1) КК ТФТ СКОПЈЕ – КК ГОСТИВАР – (4) МКК КУМАНОВО – КК КОЖУВ
(2) КК ПЕЛИСТЕР – КК ЧАИР 2030 – (3) КК МЗТ СКОПЈЕ АЕРОДРОМ – КК РАБОТНИЧКИ
Како еден од најбрзо растечките спортски брендови во државава, екипата на ТФТ покажува дека станува сериозен кандидат и за освојувањето на првата шампионска титула од своето постоење. Дека овој успех не е случаен, говорат и фактите. Екипата на ТФТ оваа полусезона ги победи и екипите со најголем буџет во нашето првенство. Доказ дека раководството на ТФТ работи правилно, чесно и одговорно. Иако оваа полусезона е најдобра за ТФТ од своето постоење, овој успех се гради и во годините наназад, како на натпреварувачки така и на организациски план. Во сезоната 2021/22 беше освоен и Купот на Македонија а веќе во следната сезона 2022/23 екипата на ТФТ беше и домаќин на ФИБА квалифацискиот турнир на Лигата на Шампиони во спортскиот центар “Борис Трајковски”. Исто така и во изминатите 2 натпреварувачки сезони екипата на ТФТ беше дел и од престижното регионално натпреварување – АБА2 лигата.
Се надеваме дека со овие постигнати резултати, ќе се појават и нови луѓе кои со вистински и чесни намери ќе го вреднуваат сето ова и би ни дале “ветер во грб” за да стигнеме до нашата крајна цел. Благодарност и до сите наши спонзори кои даваат придонес во овој наш успех.