Џуд Белингем, херојот на Англија би можел да го пропушти четвртфиналето против Швајцарија.
Ѕвездата на Реал Мадрид вчера во осминафиналето против Словачка, постигна одличен гол за израмнување во петтата минута од судиското надополнување и така ја спаси Англија од елиминацијата. Но, при прославата Белингем имаше недолични гестикулации така што во еден момент се фати за меѓуножјето и се сврте кон клупата на Словачка.
Се правдаше Белингем дека станувало збор за шега со неговите соиграчи кои биле блиску до словачката клупа, но сепак би можел да биде суспендиран.
Англичаните по продолженијата ја победија Словачка со 2:1, а за пласман во полуфиналето ќе се борат со Швајцарија. Дуелот меѓу Англија и Швајцарија се игра во сабота од 18:00 часот во Дизелдорф.
Отсуствотото на Белингем во тој натпревар сигурно би претставувало сериозен удар за „Гордиот Албион“.