Столе Димитриевски со одличните настапи со години наназад во дресот на Рајо Валјекано ги потврди своите врвни голмански квалитети во шпанската Ла Лига. Токму затоа, шпанската јавност е шокирана од она што му се случува на нашиот репрезентативец по трансферот во Валенсија, каде Димитриевски не добива шанса да ги покаже квалитетите.
За потсетување, Столе потпиша за „лилјаците“ со идеја да биде прв голман во овој клуб, бранеше на стартот од подготовките, но планот целосно се промни кога Валенсија во последен момент реши да го врати Мамардашвили на едногодишна позајмица, повторно давајќи му ја на Грузиецот улогата на стартен чувар на мрежата.
Мадридскиот весник „Марка“ посвети една страница на невообичаените случувања на „Месталја“, на текст со наслов „Парадоксот на Димитриевски во Валенсија“.
„Димитриевски беше прво засилување за Валенсија во текот на летото, постојано бранеше во текот на подготовките и се одеше во најдобар ред за него се до моментот кога беше одлучено Мамардашвили да дојде на едногодишна позајмица од Ливерпул. Оттогаш Столе има нула минути и уште чека на своето деби. Најголемото летно засилување седи на клупата и најверојатно ќе му биде дадена шанса во меч од Купот против екипа од некоја од пониските лиги во Шпанија. Ситуацијата за него не е лесна бидејќи пред да потпише беше слободен играч и имаше понуди и од други клубови од Шпанија и Европа, но Столе ја избра Валенсија затоа што очекуваше да биде прв голман и да го покаже својот квалитет“, се вели во текстот на „Марка“ за македонскиот голман.
Димитриевски засега е со став да остане и да се бори, но не се исклучува можноста тој во јануари да замине на шестмесечна позајмица, а потоа летото 2025 да се врати на „Месталја“ и по заминувањето на Мамардашвили во Ливерпул и дефинитивно да му се исполни големата желба – да стане прв голман на Валенсија.