Ѕвездата на „Squid Game“ О Јеонг-су е прогласен за виновен за сексуален напад откако насилно бакнал и пипкал со колешка од театарот.
Окружниот суд Сувон денеска објави дека јужнокорејскиот актер е осуден на осум месеци затвор, а исто така му е наредено да присуствува на 40 часа предавања за сексуално насилство.
Судијата Јеонг Јеонџу изјави дека сведочењето на жртвата изгледа конзистентно и му се чини дека таквите изјави не можат да се дадат доколку жртвата всушност не ги доживеала. Сепак, 79-годишниот актер при напуштањето на судот изјави дека планира да ја обжали одлуката. Тој има рок од седум дена да поднесе жалба или пресудата ќе биде потврдена.
Инаку, О Јеонг-су беше обвинет во 2022 година за сексуална злоупотреба на жена, чиј идентитет не е познат.
Инцидентите се случиле во Сувон, каде актерот престојувал на театарска претстава во 2017 година, а нападите се случиле на пешачка патека и пред куќата на жртвата.
Овие обвинувања доведоа до тоа актерот да биде исфрлен од филм во Јужна Кореја.
За потсетување, О Јеонг-су го освои Златниот глобус за најдобра споредна машка улога во серија за неговата улога како ранлив старец во хит-серијата на Нетфликс „Squid Game“ и со тоа стана првиот Јужнокореец што ја добил оваа престижна награда.