Одлуката на Европскиот парламент да поддржи измена на законот за правата на авионските патници, со која се предлага задолжително бесплатно носење рачен багаж до седум килограми, може да донесе значителни промени за милиони патници низ Европа. Сепак, ова правило сѐ уште не е усвоено како закон и во моментов не важи за сите авиокомпании.
Според новиот предлог, патниците ќе може да носат една торба до 7 кг, плус уште еден мал личен предмет што може да се стави под седиштето. Оваа иницијатива треба да помине уште неколку институционални чекори, вклучително и преговори со Советот на ЕУ и Европската комисија, пред да стане официјална регулатива. Предлогот предизвика силни реакции кај авиокомпаниите, особено кај нискобуџетните превозници, кои предупредуваат дека ваквата регулатива може да доведе до зголемување на цените на билетите, дури и за патници со минимален багаж.
Во моментов, секоја авиокомпанија има свои правила за тежината и димензиите на рачниот багаж:
Ryanair дозволува бесплатно само мала чанта со максимални димензии 40x20x25 см, која мора да собира под седиштето. За „стандардна“ рачна торба (куферче до 10 кг и 55x40x20 см) се доплаќа.
Wizz Air дозволува бесплатно само мала чанта до 40x30x20 см. За поголем рачен багаж до 10 кг се наплатува дополнителен надомест.
Lufthansa овозможува бесплатен рачен багаж до 8 кг со димензии 55x40x23 см за стандардни карти.
Air France дозволува бесплатен рачен багаж до 12 кг (55x35x25 см), плус мал личен предмет, во зависност од класата на билетот.
Правната основа за иницијативата се темели на пресудата на Судот на правдата на Европската Унија од 2014 година, во која е утврдено дека рачниот багаж е „неопходен аспект“ на патничкиот транспорт, под услов да ги исполнува „разумните барања“ во однос на тежината и димензиите. Сепак, пресудата не прецизира конкретна тежина или големина, па авиокомпаниите и понатаму имаат слобода сами да ги определуваат овие параметри.
Доколку новото правило биде конечно усвоено, ќе се воведе унифицирано ограничување од 7 кг за бесплатен рачен багаж, што би било голема промена, особено за патниците на нискобуџетните авиокомпании. Засега, патниците треба внимателно да ги проверуваат политиките на избраниот превозник пред патување, бидејќи бесплатниот лимит за рачен багаж значително варира.