Зошто некои луѓе никогаш немаат секс, дури и во зрелоста? Тоа е прашањето што го истражуваше меѓународен истражувачки тим во најголемата студија од ваков вид досега.
Авторите, кои ја објавија својата студија во списанието PNAS, открија дека невиноста во подоцнежниот живот е резултат на сложена мешавина од психолошки, социјални и генетски фактори.
-Романтичните и сексуалните врски често се важна социјална поддршка. Нивното отсуство е поврзано со осаменост, анксиозност, депресивни чувства и намалена благосостојба за многумина, рече коавторката Лаура Веселдијк од германскиот Институт за емпириска естетика „Макс Планк“ (MPIEA) во Франкфурт.
Истражувачкиот тим, во кој учествуваа научници од Холандија и Австралија, анализираше податоци од повеќе од 400.000 луѓе во Велика Британија на возраст од 39 до 73 години. Околу еден процент од испитаниците изјавија дека никогаш немале секс.
Што имаат заедничко луѓето без сексуално искуство? Оваа група во просек била подобро образована, но исто така и поосамена, поанксиозна и помалку среќна од оние со сексуално искуство, соопшти MPIEA.
Истражувачите, исто така, откриле дека доживотната невиност била почеста во области со поголема нееднаквост во приходите.
Кај мажите, физичките карактеристики, исто така, играле голема улога. Мажите кои никогаш немале секс имале поголема веројатност да имаат помала градба. Исто така, тие имале тенденција да живеат во области со помалку жени.
Околу 15 проценти од разликите во доживотната невиност би можеле да се објаснат и со генетски фактори.
Коавторот Абдел Абделауи од Универзитетот во Амстердам објасни: „Највпечатливо е преклопувањето со генетските фактори поврзани со интелигенцијата, образованието и невроразвојните нарушувања како што е аутизмот“.
Студијата, исто така, открила дека луѓето кои никогаш немале секс имале помала веројатност да користат алкохол или дрога и имале поголема веројатност да носат очила кога биле помлади.
„Тука гледаме група луѓе кои се посклони кон социјално повлекување и затоа имаат поголеми тешкотии да најдат партнер“, рече коавторот Брендан Сич од Универзитетот во Квинсленд во Австралија.