Украина денеска го одбележува Денот на националното знаме. Одбележувањето на овој ден е „во чест на вековната историја на украинската државност, државните симболи на независна Украина, како и за промовирање на почитувањето на државните симболи на Украина“, со претседателски декрет од 23 август 2004 година.
Во 2009 година, декретот беше изменет за да се воведе годишна официјална церемонија на подигнување на знамето низ Украина на 23 август.
Сините и жолтите бои на украинското знаме имаат најмалку илјадагодишна историја и датираат од времето на Киевска Русија и кнежевството Галиција-Волинија. За време на бранот револуции во Европа во 1848 година, наречен „Пролет на народите“, сино-жолтото знаме беше воспоставено како знаме на украинскиот народ. Во јуни 1848 година, знамето за прв пат беше подигнато над градското собрание на градот Лавов.
Потврдувањето на сино-жолтото знаме како национално се случува со прогласувањето на Украинската Народна Република. После тоа, во историјата на Украина има период на црвено знаме со срп и чекан, а Украинците се фрлени во затвор поради боите на синото и жолтото знаме.
Националното сино-жолто украинско знаме беше официјално подигнато за прв пат над градското собрание на Стриј на 14 март 1990 година. Во Киев, украинското знаме беше подигнато над градското собрание на 24 јули 1990 година.
На 23 август 1991 година, група украински пратеници го донесоа сино-жолтото знаме во салата за состаноци на Врховната Рада на Украина, а на 4 септември беше свечено подигнато над зградата на Парламентот.