Кошаркарите на Бостон Селтик од стартот на сезоната не знаеја за домашен пораз во НБА лигата, беа на скор од 20-0, а потоа на мегдан им дојде ланскиот првак.
Деневер Нагетс слави во драмата во „ТД Гарден“ со 100-102, ставајќи крај на лудата домашна серија на Селтикси кои во текот на мечот имаа и двоцифрена предност која ја испуштија.
Џамал Мареј и Никола Јокиќ диригираа, за нив домашната одбрана немаше решение и го поведоа тимот до победата. Мареј беше најдобар поентер со 35 на своето конто, додека Јокиќ беше на чекор од нов „трипл-дабл“ со 34 поени, 12 скока и девет асистенции. Во тимот на Бостон се истакнаа Вајт со 24, Тејтум со 22 и Порзингис со 21 поен.
На останатите терени Бруклин славеше во Лос Анџелес против Лејкерси (112-130), Портланд беше подобар од Индијана (118-115), Шарлот триумфира со Сан Антонио (124-120), Филаделфија на гости се радуваше против Орландо (100-124) и Атланта победи во Флорида против Мајами (108-109).