Возачот на Ентони Џошуа е обвинет за неговата улога во сериозна сообраќајна несреќа во која загинаа двајца членови на тимот на боксерот.
Личниот тренер на Џошуа, Латиф „Лац“ Ајоделе, и специјалистот за спортска и рехабилитациска медицина Сина Гами, загинаа во понеделник откако возилото во кое се возеле се судрило со камион паркиран на работ од патот во државата Огун, Нигерија.
Возачот на автомобилот, Аденији Моболаџи Кајоде (46), во петок се појавил во судот за прекршоци во Сагаму.
Тој е обвинет за предизвикување смрт со опасно возење, невнимателно и неодговорно возење, возење без должно внимание и возење без важечка возачка дозвола. Случајот е одложен до 20 јануари.
Портпаролот на полицијата, Олусеји Бабасеји, потврди дека на обвинетиот му е одобрена кауција од пет милиони наири (околу 3.000 евра), со двајца гаранти, но дека ќе остане во притвор додека не ги исполни условите за кауција.
Кајоде е во полициски притвор од четврток, кога беше пуштен од болница.
Според Бабатунде Акинбији, портпарол на Агенцијата за безбедност и спроведување на сообраќајот во државата Огун, прелиминарните истраги покажуваат дека возилото во кое се наоѓал Ентони Џошуа се движело со голема брзина.
„Првичните истраги покажуваат дека возилото во кое се наоѓал Ентони Џошуа се движело со голема брзина.
За време на инцидентот, предната гума од страната на совозачот пукнала, предизвикувајќи возилото да изгуби контрола и да се лизне, по што се судрило со паркиран камион. Брзината била прекумерна, рече Акинбији.
Нигериската полиција, исто така, започна потрага по возачот на камионот, за кој е утврдено дека бил нелегално паркиран покрај патот.
„Камионот бил паркиран покрај автопатот, што е нелегално. Возилото не било расипано и возачот не бил присутен во времето на несреќата“, изјави полициски извор.
Ентони Џошуа беше отпуштен од болница во среда вечерта откако претрпел полесни повреди во несреќата. Тој и неговата мајка веднаш го посетија погребалниот дом за да се збогуваат со своите пријатели кои починаа.
По трагичната смрт на Ајоделе и Гами пристигнаа бројни пораки со сочувство, вклучувајќи една од долгогодишниот промотор на Џошуа, Еди Херн.
„Почивајте во мир, Лац и Сина. Вашата енергија, лојалност и многу други квалитети многу ќе ни недостигаат. Се молам за сила и водство за нивните семејства, пријатели и, секако, Еј Џеј во ова исклучително тешко време“, напиша Херн.