Женската кошаркарска репрезентација на Македонија по воведната победа над Данска го доживеа првиот пораз во квалификациите за пласман на Европското првенство откако загуби на домашен терен од Грција со 84-101.
Избраничките на Ашаданов имаа сила само за една четвртина против фаворитот откако одиграа одлични 10 минути по кои резултатот беше 23-23.
Сепак, следуваше голем пад во вториот период па грчките кошаркарки на полувреме заминаа со предност од 39-59. Во вториот дел Грција рутински го приведе мечот до самиот крај за конечен триумф од 84-101.
По мечот селекторот Александар Ашаданов даде свој осврт.
„Најпрво, сакам да и честитам на мојата екипа која покажа голем карактер, особено во третата четвртина кога тргна да се враќа од длабок минус и ниту еднаш не се предаде. Исто така честитки и до оваа публика, и се надевам дека ќе биде така, и ќе има се повеќе народ на трибините, како и за малите девојчиња кои добиваат шанса и во играчите гледаат идоли. Ни следи сега дуел со Хрватска, тие славеа над Грција, но загубија од Данска. Ништо не е решено, ќе играме максимално, па зошто да не успееме до изненадување и да дојдеме до скор 2-1? Овој тим веќе трет циклус е заедно, младите растат, посебно во умот, дека може да играат со сите и дека нема предавање на секој меч. Горд сум и чест ми е што сите дем онстрираа такво нешто на стартните два меча на домашен терен“, изјави Ашаданов.