Двајца осомничени уапсени за спектакуларната кражба на накит во музејот Лувр „делумно“ ја признаа својата вмешаност, потврди париската обвинителка Лаура Бекуо на прес-конференција одржана денес, објави Скај њуз.
Четворица крадци украле девет парчиња накит на 19 октомври, додека светски познатиот музеј бил отворен за посетители. Еден од предметите паднал и бил пронајден на местото на настанот. Бекуо додаде дека украдениот накит сè уште не е пронајден.
Таа, исто така, се осврна на медиумските извештаи дека полицијата се сомневала во помош „одвнатре“, но ги отфрли овие шпекулации.
„Нема докази дека крадците имале помош одвнатре “, рече таа.
Рокот на притвор истекува
Според францускиот закон, притворот за организирана кражба може да трае максимум 96 часа. Тој рок е пред истекување, што значи дека обвинителите мора да одлучат дали да подигнат обвинение против осомничените, да ги ослободат или да побараат од судија да го продолжи нивниот притвор.
Признати се големи безбедносни пропусти
Случајот, исто така, фрли светлина врз сериозните недостатоци во безбедноста на Лувр. Шефот на париската полиција, Патрис Форе, им призна на пратениците дека застарените безбедносни системи создале критични ранливости.
„Не е преземен никаков технолошки чекор“, рече тој.
Форе, исто така, го откри шокантниот факт дека лиценцата за безбедносни камери на музејот истече во јули и не е обновена.
За да биде уште полошо, првата дојава за грабежот не дојде од алармниот систем на музејот, туку од велосипедист кој ги видел мажите со шлемови и дизалица и ја повикал полицијата.