Општина Старо Нагоричане во соработка со Општинската организација на Црвен крст Куманово објави оглас за обука на негуватели/негувателки за грижа и нега на стари лица и лица со попреченост, информираа денеска од општината. Повикот се спроведува во рамки на проектот „За подобрување на социјалните услуги“, поддржан од Светска банка и Министерството за труд, социјална политика, демографија и млади.
Според јавниот повик, сите заинтересирани жители на општината кои исполнуваат основни критериуми може да аплицираат во периодот од 11 до 31 јули 2025 година. Кандидатите треба да бидат полнолетни државјани на Република Македонија, со минимум завршено основно образование, да поседуваат општа психофизичка способност за работа и да имаат изразена мотивација за грижа за стари и немоќни лица.
Пријавените ќе бидат повикани на индивидуално интервју за проценка на нивната мотивација и соодветност за програмата.
Пријавувањето може да се изврши електронски на е-mail адресата: [email protected], лично во просториите на Црвен крст Куманово на ул. „11-ти Октомври“ бр. 4 или во Општина Старо Нагоричане.
Општината е сместена во североисточниот дел од земјава. Според податоците од последниот попис во Старо Нагоричане има 3.051 жител во 39 населени места.