Американската кошаркарска НБА ѕвезда Кевин Дурант официјално е нов играч на Хјустон, а рекордни седум клубови беа вклучени во договорот околу неговиот трансфер од Феникс.
Заедно со Хјустон и Феникс, во трансферот на Дурант, кој ќе наполни 37 години пред почетокот на следната сезона, се вклучени и Бруклин, Голден Стејт Вориорс, Атланта, Лос Анџелес Лејкерс и Минесота.
Дурант минатата сезона стана само осмиот играч кој постигнал 30.000 поени во кариерата, освои една награда за најкорисен играч (2014), две НБА титули со Голден Стејт (2017, 2018) и беше прогласен за најкорисен играч во двете финалиња, а учествуваше и во 15 Ол-стар натпревари.
Дурант зад себе има четири златни олимписки медали со репрезентацијата на САД (Лондон 2012, Рио 2016, Токио 2021, Париз 2024).
Хјустон ќе биде петтиот НБА клуб во кариерата на Дурант, која почна во 2007 година.