Претседателот на Турција, Реџеп Тајип Ердоган уште еднаш повика на усвојување на нов устав, јавуваат турските медиуми.
Тој ги повика особено опозициските партии да го поддржат предлогот на неговата Партија на правдата и развојот (АКП) за нов устав.
-Иако опозицијата не ги слуша нашите искрени повици, ни треба демократски, инклузивен и либерален устав направен од граѓаните, рече Ердоган викендот.
Тој ги отфрли обвинувањата дека иницијативата е диктирана од политички мотиви.
-Новиот устав не е луксуз за Турција, туку неопходност што е одамна задоцнета, рече Ердоган, цитиран од Хуриет.
Ердоган и АКП долго време го критикуваа постоечкиот устав, главно поради тоа што беше изготвен по воениот удар во 1980 година.
-Патот до усвојување на новиот устав е комплициран, бидејќи АКП го нема потребното парламентарно мнозинство за да го протурка предлогот. За да се организира референдум по ова прашање потребна е поддршка од повеќе од 30 пратеници од опозицијата.
Претседателот на парламентот Нуман Куртулмуш од почетокот на мај разговара со претставници на опозицијата за новиот предлог за устав.