Шефот на украинската дипломатија, Андриј Сибиха, денеска,во првичната украинска реакција на објавата на рускиот претседател Владимир Путин за тридневен прекин на борбите од 8 до 10 мај, на платформата X изјави дека „доколку Русија навистина сака мир, борбите треба веднаш да прекинат“.
„Зошто да се чека до 8 мај? Ако огнот може да престане сега и да трае без прекин најмалку 30 дена, тоа би покажало дека примирјето е вистинско, а не само заради парада“, напиша Сибиха.
Тој додаде дека Украина е подготвена да поддржи траен, стабилен и целосен прекин на огнот: „Тоа е она што ние постојано го предлагаме“.
Претходно денеска официјален Кремљ објави дека планира да ги прекине борбите во Украина од полноќ меѓу 7 и 8 мај до 11 мај, по повод 80-годишнината од крајот на Втората светска војна.
Кремљ објави дека очекува Украина да го прифати примирјето, но предупреди дека, во случај на негово кршење, руските сили „ќе одговорат соодветно и ефикасно“. Истовремено, Русија уште еднаш ја изрази својата подготвеност за мировни преговори без предуслови и посредници. (МИА)