Израелската воена операција против Иран нема да заврши додека Израелските одбранбени сили (ИДФ) не ја отстранат заканата од иранската нуклеарна програма и балистичките ракети, соопшти армијата, но одби да прецизира временска рамка.
– Продолжуваме да ги напаѓаме нуклеарните цели за да го продлабочиме успехот, според планот и во време кое нам ни одговара, изјави генерал-мајор Одед Басиук, шеф на Дирекцијата за операции на ИДФ, во разговор со новинари.
ИДФ нагласи дека операцијата е во тек и не е при крај. Целта е на крајот да се елиминира „егзистенцијалната закана“ од иранската нуклеарна програма и ракетниот арсенал.
– Го напаѓаме терористичкиот режим, а не народот, кој заслужува подобра иднина. Заканата за нас ја претставува раководството во Техеран, а не граѓаните кои шетаат низ улиците на Шираз, изјави Басиук.
Армијата соопшти дека ќе продолжи да напаѓа нуклеарни објекти и поврзани цели, вклучувајќи нуклеарни научници, балистички ракети, воздушна одбрана, воени командни центри и други „критични“ цели на иранскиот режим.
Досега, според армијата, се уништени или неутрализирани повеќе од 200 лансери на балистички ракети, што претставува значителен дел од иранскиот арсенал.
Овие напади го попречиле обидот на Иран да испрати повеќе ракети кон Израел, но ИДФ проценува дека Иран и понатаму располага со капацитет за напади кои можат да предизвикаат сериозна штета во Израел.
– Ќе останеме подготвени за одбрана. Проценувам дека Иранците ќе продолжат да се обидуваат да му наштетат на Израел, рече Басиук.
Што се однесува до иранската нуклеарна програма, армијата тврди дека досегашните напади предизвикале значителна штета врз можноста на Техеран да дојде до бомба, но операцијата сѐ уште не е завршена. Детали за предизвиканата штета ќе бидат објавени по завршување на операцијата.
– Нема да дозволиме нуклеарен Иран да го претвори Блискиот Исток во гробница, изјави Басиук.
Во меѓувреме, Израелското воено воздухопловство има воздушна контрола над западен Иран и Техеран, откако уништи повеќе ирански системи за противвоздушна одбрана, но летовите над Иран сѐ уште не се без ризик, соопшти ИДФ.