понеделник, 24. јануари 2022. Вести денес: 72
home Вести

Директорот на ЦИА се сретна со директорот на руската безбедносна служба во Москва

Директорот на ЦИА се сретна со директорот на руската безбедносна служба во Москва

Директорот на ЦИА, Вилијам Барнс денеска во Москва се сретна со многу влијателниот директор на Советот за безбедност на Русија Николај Патрушев со кого разговараа за „руско-американските врски“.

За состанокот е издадено само кусо соопштение од рускиот Совет за безбедност, додека американската Амбасада во Москва не ја коментираше средбата.

Посетата на шефот на американската разузнавачка агенција, кој според многумина е најискусниот дипломат на САД, не беше најавена, а рускиот совет за безбедност не откри други детали.

Средбата на двајцата високи функционери се одржува во време кога во руско-американските односи има големи контроверзии.

Западните земји воведоа санкции кон Русија по нејзината анексија на Крим во 2014 година.

Вашингтон ја обвинува Русија за серија хакерски напади и мешање во изборите во САД.

Москва, од друга страна, често ги обвинува САД и Западот дека се мешаат во нејзината внатрешна политика и вршат притисок врз руски новинари.

Руси и Американци се сретнаа во Женева на 30 септември за да го продолжат стратешкиот дијалог што Владимир Путин и Џо Бајден го започнаа на брегот на Женевското езеро во јуни.

Бајден и Путин на историскиот самит на 16 јуни истакнаа дека дијалогот меѓу двете земји е итно потребен, иако тие не се согласуваат за многу прашања. Тие потсетија дека Москва и Вашингтон разговарале дури и во екот на Студената војна за да го спречат најлошото.

Вилијам Барнс, дипломат од кариера, беше амбасадор во Русија и Јордан и заменик државен секретар во времето на Барак Обама.

За време на мандатот на поранешниот демократски претседател, тој го охрабруваше зближувањето со Иран, со кој тајно преговараше во Оман во 2011 и 2012 година, иако САД не одржуваа дипломатски врски со Техеран. (МИА)

Коронавирус