среда, 14. ноември 2018. Вести денес: 114
home Вести

Десетици жртви по напади на талибанците во две авганистански провинции

Десетици жртви по напади на талибанците во две авганистански провинции

Најмалку 14 лица загинаа во талибански напади во северната авганистанска област Тахар и југоисточната провинција Газни, соопштија денеска локалните власти.

Од 14 до 20 војници на авганистанската армија беа убиени откако милитантите ја нападнаа нивната база во областа Кавја Гар во Тахар околу еден часот по локално време, изјавија членовите на провинцискиот совет Мохамед Азам Афзали и Сајед Салахудин Бурхани за ДПА.

Според нив, во нападот биле повредени меѓу 10 и 16 лица.

Афзали изјави дека во близина на округот Даш-е Арчи синоќа биле убиени седум војници, а неколкумина биле ранети.

Во меѓувреме, продолжуваат и нападите на талибанците во областа Џагори во Газни, и засега не е познато колку војници и цивили  загинале во овие инциденти.

Талибанците рано утрово почнале да напаѓаат и презеле два полициски контролни пункта кои претходно ги загубија во воздушните напади во областите Хоткул и Давуд, соопштија членовите на провинцискиот совет, Калик Дад Акбари и Мохамад Навроуз. Борбите во областа се уште се во тек.

МИА