четврток, 22. октомври 2020. Вести денес: 133
home Вести

Цукерберг се извини за грешката: Не ја проценивме добро нашата одговорност

Цукерберг се извини за грешката: Не ја проценивме добро нашата одговорност

Извршниот директор на Фејсбук, Марк Цукерберг призна дека не успеал да го зашити личниот живот на корисниците на социјалната мрежа, чии лични податоци можат да бидат искористени за политички цели, истовремено и да ја заштити и  компанијата.

Во сослушувањето на седницата на Комисиите за трговија и правни прашања на Сенатот на САД, кое траеше речиси пет часа, 33-годишниот Цукерберг детално одговараше на прашањата на сенаторите.

– Ние не продаваме податоци, изјави Цукерберг и негираше дека компанијата му е средство за следење на луѓе на интернет.

Според сенаторите, социјалната мрежа формирана во 2004 година, не успеала да ги заштити личните податоци на корисниците и дозволила политички манипулации.

Полемиката се разви во средината на март по скандалот со фирмата „Кембриџ аналитика”.

Податоците на околу 87 милиони корисници се најдоа во рацете на британската фирма за анализа на податоците, пред Фејсбук да почне да воведува ограничувања во 2014 година. Фирмата потоа работеше за предизборниот тим на Доналд Трамп во кампањата на претседателските избори во 2016 година.

– Не ја проценивме добро нашата одговорност и тоа беше голема грешка. Тоа беше моја грешка и се извинувам за неа, рече Цукерберг.

– Денес е очигледно дека не сме направиле доволно, за да спречиме тие алатки да бидат искористени недобронамерно, додаде шефот на Фејсбук.

Компанијата со над две милијарди корисници е обвинета дека послужила како инструмент за дезинформации и политичка манипулации, извршени, според американското разузнавање од Кремљ, со цел да го олесни изборот на Доналд Трамп за претседател на САД. Москва ги отфрли таквите обвинувања.

Коронавирус