понеделник, 19. ноември 2018. Вести денес: 12
home Регион

Тачи нема да ја посети Прешевската Долина

Тачи нема да ја посети Прешевската Долина

Косовскиот претседател Хашим Тачи изјави дека не поднел барање до српските власти за дозвола за посета на Прешевската Долина, затоа што, како што рече, го знае одговорот, јави дописникот на МИА од Приштина.

Тачи по вчерашната средба со политичките претставници на Албанците од Прешево, Бујановац и Медвеѓа изјави дека тие го поканиле да го посети регионот во јужна Србија, но дека тој не може да го стори тоа.

– Знаете дека во Србија сум осуден во отсуство. Околностите се такви што Белград смета дека оваа посета не е оправдана и не е корисна. Јас сакам да ги посетам, сакам да ги видам, да отидам во нивните домови, да поразговарам со нив. Знам дека имаат проблеми и грижи, тоа е најдискриминираната заедница во Европа, изјави Тачи.

Напоменувајќи дека има и други раководители на институции кои се осудени и се гонат од српските власти заради учество во војната, Тачи ги повика сите оние кои можат, како пратеници и разни лидери, да ги посетуваат почесто Албанците од Прешевската Долина.(МИА)