Барселона ја продолжи одличната серија во 2025 година и се пласира во полуфиналето на Купот на Кралот. Победата од 0-5 во Валенсија ги донесе Каталонците на чекор до трофејот.
Тренерот Ханси Флик беше презадоволен од победата и ги пофали своите фудбалери.
„Многу сум среќен како одигравме. Почнавме силно и создадовме голем број на шанси. Ова е стилот на игра што сакаме да го видиме. Секогаш барам да дејствуваме динамично. Ние сме млад тим и гладни сме за победи.
Понекогаш морам да барам од играчите да бидат повнимателни во последните минути од натпреварите и да ја контролираат ситуацијата на теренот“, истакна Флик.
Ждрепката за полуфиналните парови во Купот на Кралот е закажана за следната среда.