Интер постигна четири гола против Барселона на реваншот во Милано и мора да се нагласи дека играчите на домашниот тим беа расположени за полнење на противничката мрежа, но истовремено, избраниците на Симоне Инѕаги имаа среќа што меѓу стативите имаа и исклучително инспириран голман.
Yann Sommer masterclass ⛔👏@QatarAirways | #LetsFly pic.twitter.com/Dk7aKhSl0p
— UEFA Champions League (@ChampionsLeague) May 6, 2025
Јан Зомер сосема заслужено беше избран за играч на натпреварот и доби МВП признание од УЕФА по крајот на епското полуфинале на „Џузепе Меаца“, натпревар на кој имаше низа неверојатни одбрани, од кои три беа навистина нестварни.
Зомер во два наврати ги доби дуелите со Ламин Јамал и успеа да ја стопира младата ѕвезда на Барса, но во второто полувреме, режираше и една вонсериска одбрана по удар на Ерик Гарсија.
Како МВП на второто полуфинале кое го одиграа големите европски ривали, Зомер доби за задача да ја избере најдобрата одбрана, а според него тоа е онаа од 114-та минута кога го спречи ударот на Јамал при водство од 4:3 (прва на видеото).
– Многу сум среќен за победата и пласманот во големото финале. Ова беше одличен натпревар, тимот заврши извонредна работа како целина. Од сите одбрани кои ги имав, најтешка беше онаа последната. Јамал секогаш влегува многу силно и шутира во подалечниот агол. Сите верувавме во ова, од прв до последен. Секогаш верувавме дека можеме да победиме, така беше од првата до последната секунда од натпреварот, – изјави Зомер.