Во време кога музичката индустрија е изложена на бројни предизвици, Александра Пријовиќ се издвојува како уметник кој успешно балансира помеѓу сцената, приватниот живот и бизнисот – и година по година ги поместува границите на регионалната музичка сцена.
Иако Александра Пријовиќ се повлече од јавноста во последните месеци поради напредната бременост, интересот за нејзината музика не се намалува – напротив, достигнува нови височини. Додека пејачката е во медиумска илегала, нејзиниот YouTube канал бележи историски успех – Александра стана првата балканска ѕвезда која успеа да надмине една милијарда прегледи со само 64 прикачени видеа.
Таа го постигна овој импресивен резултат 12 години по отворањето на каналот, што сведочи за континуираната популарност на нејзината музика и силната поврзаност со публиката.
Најгледаното видео на каналот е, како што се очекуваше, видеото за мегахитот „Дам, дам, дам“, кое досега собра дури 97 милиони прегледи. На каналот, покрај видеата од албумот, има и архивски интервјуа и гостувања, но нивниот квантитет останува скромен во споредба со другите уметници – што само дополнително го нагласува огромниот успех на Пријовиќ на платформата.
Со оглед на тоа што заработката на YouTube е во просек помеѓу 800 и 1.200 евра на милион прегледи, едноставната пресметка води до проценката дека Александра собрала над милион евра само од YouTube, а тоа е без да се земат предвид приходите од други стриминг услуги како што се Spotify и Deezer, каде што таа е исто така меѓу најслушаните изведувачи од регионот.