вторник, 26. март 2019. Вести денес: 0
home Општини

Пропуст или нов скандал во општина Охрид: ЈП „Билјанини Извори“ со лажен годишен финансиски извештај

Пропуст или нов скандал во општина Охрид: ЈП „Билјанини Извори“ со лажен годишен финансиски извештај

Дали јавното претпријатие „Билјанини извори“ направило пропуст во годишниот финансиски извештај или на повидок е нов скандал, пренесе Охрид 24.

Советникот од редовите на ВМРО-ДПМНЕ, Гоце Георгиески на седница на советот на општина Охрид, обелодени дека јавното претпријатие го лажирало извештајот, за што посочи одредени факти наведени токму во извештајот.

Според Георгиески на страната од извештајот каде што се трошоците за продажба за 2018 година, конечната сума доставена од претпријатието се разликува со вкупната сума собрана поеднинечно од сите трошоци.

-Оваа сума дадена од ЈП „Билјанини извори“ накрај изнесува 11 772 355, а собрано поединечно 11 225 830 односно 546 000 денари фалат или имаат додадено. Ова е преседан, нагласи советникот.

-Доколку се навлезе подлабоко во извештајот, ќе се види дека трошоците за привремени вработувања според тромесечниот извештај заклучно со 30.09.208 изнесувале околу еден милион денари, а во завршниот е наведено дека се потрошени 914 илјади денари. Како е можно тоа, како се намалиле на годишно ниво во споредба со месечниот извештај, прашува Георгиески.

Тој на седницата го цитираше и одговорот од директорката на јавното претпријатие даден на 18 седница на советот на општина Охрид, во однос на тоа прашање.

„Што се однесува во однос на ставката привремени вработувања, пред шест месеци од инспекторите за труд и социјална, ни беше наложено дека освен тоа што на договорите пишуваше фиксна цена, а секое лице мораме да го поставиме и нивниот стаж, кој досега не го стававме. Тоа доведе до поголеми трошоци“, се вели во цитатот.

Исто така, додаде советникот, во извештајот е наведено дека приходите од закупнина се 1 386 354, а во 2018 приходите се 490 000.

-Дури и добивката, билансот на успехот што го наведувате во извештајот не соодветствува. Нето добивката е 3 204 197, званичен документ што го доставувате, а во образложението ми доставувате износ 3 492 000, потенцира Георгиески.

Георгиески напомена дека доколку советот го усвои ваквиот извештај станува соучесник во измамата и побара точката да се повлече од дневен ред.

Инаку ЈП „Билјанини извори“ како што објавивме претходно се наоѓа во првите сто должници кон државата со долг од над 22 милиони денари.

ОХРИД 24