вторник, 24. ноември 2020. Вести денес: 169
home Вести

Среќен именден Јулија и Јулијана: Денес ја славиме Светата маченичка и девица

Среќен именден Јулија и Јулијана: Денес ја славиме Светата маченичка и девица

Денеска се слави Светата маченичка и девица Јулија. Именден слават сите кои го носат нејзиното име ( Јулија, Јулијана).

Ако добиете ќерка овој месец, нема подобра симболика од тоа да ѝ до дадете името на месецот во кој е родена ( јули). Личностите кои го носат ова име се сметаат за убави и ведри.

Јулија е женско име кое се користи во многу јазици. Машки пар на оваа име е името од латинско потекло Јулијанус (лат: Julianus), а има значење млада, полна со живот и од родот на Јулиј. Името е посветено на митолошкиот бог на светлината Јупитер.

Светата маченичка и девица Јулија

Родум од Картагена, од прочуен род. Кога Персијците ја покорија Картагена, многуброен народ беше одведен во ропство. Беше фатена и заробена и света Јулија и му падна во рацете на некој трговец во Сирија. Трговецот беше незнабожец. Кога виде дека света Јулија е христијанка, ја советуваше да се откаже од Христа и да стане едноверна со него. Јулија никако не се согласуваше со тоа. Па бидејќи беше верна и добра во служењето, трговецот ја остави и не ѝ додеваше повеќе за верата. Еднаш тој натовари кораб со стока, ја зеде со себе Јулија и тргна во далечни краишта по трговија.

Кога пристигнаа на Корзика, се падна некој незнабожечки празник, а Јулија остана на коработ плачејќи од жал што многубројни луѓе живеат во глупава заблуда и не знаат за вистината. Но незнабожците некако дознаа за неа, ја извлекоа од коработ и иако нејзиниот господар им се противеше, почнаа страшно да ја мачат, ѝ ги отсекоа градите и ги фрлија на еден камен, а потоа ја распнаа на крст. Тогаш Јулија Му го предаде својот дух на Господ. Ангел Божји им ја објави нејзината смрт на монасите на блискиот остров Маргарита (или Горгона) и тие дојдоа и чесно го погребаа телото на маченичката.

На гробот на света Јулија се јавуваа многубројни чуда. Таа пострада чесно во 6 век. После многу години верните посакаа да изградат нова црква во чест на света Јулија на едно друго место, бидејќи старата црква остаре и пропадна. Но ноќта наспроти денот кога сакаа да го положат темелот, граѓата за црквата со невидлива рака беше пренесена до старата црквичка. Во недоумение луѓето повторно ја пренесоа граѓата на новоизбраното место, но пак се случи истото: материјалот се врати на местото кај старата црква. Од ова сите разбраа дека света Јулија не сака да ѝ ѕидаат црква на друго место, па ја срушија старата црквичка и на тоа место подигнаа нова.

Коронавирус