среда, 28. јули 2021. Вести денес: 152
home Вести

Петнаесеттина штипски здравствени работници сѐ уште ја немаат добиено ковид наградата

Петнаесеттина штипски здравствени работници сѐ уште ја немаат добиено ковид наградата

Над 15 штипски здравствени работници од Клиничка болница-Штип кои во битката со коронавирусот се вклучија по 6 декември 2020 година сѐ уште ја немаат добиено заслужената награда од 30.000 денари. Директорот на Клиничка болница-Штип, Ален Ѓеорѓијев денеска потврди дека дополнителниот список со овие вработени е испратен до Министерството за здравство и Фондот за здравствено осигурување. Наградата за битката со коронавирусот е пристигната до над 220 вработени во штипската болница.

-После датумот кога беше направен пресекот и друг персонал се вклучи во битката со коронавирусот. Така да парите беа пуштени само врз база на првобитните списоци, се она што отпосле дојде да работи таму. Ние имаме неколку пати комуникација со Министерство за здравство. Ние сме спремни како болница да им ги дадеме наградите, коишто отпосле дојдоа и се вклучија во битката со коронаинфекцијата. Но, мора да имаме одобрение од Министерство за здравство, кое го чекаме да ни го одобри и од сопствени средства да им даде награда на луѓето, кои отпосле се вклучија во битката, вели Ѓеорѓијев.

Во штипската модуларна болница во моментов се хоспитализирани тројца пациенти, од кои еден е потежок, а останатите двајца се со полесна здравствена состојба.

-Да ја искористам приликата и да апелирам граѓаните кои се уште не се вакцинирани, да се пријават и да се имунизираат, со цел есента да ја дочекаме без поголеми проблеми, вели Ѓеорѓијев.

Во моментов тече и реконструкцијата на зградата на Инфективното одделение, според проценките на Ѓеорѓијев досега околу 30 % од градежните работи се завршени, а рокот за санација е крајот на август. Санацијата се реализира со пари од Прогарамата за меѓугранична соработка Бугарија –Северна Македонија од фондовите на ЕУ. Ѓеорѓијев посочува дека работата на останатите одделенија е вратена во нормала, се работи и на оперативни зафати, а најголем наплив на пациенти имаат на кардиологија, хирургија и ортопедија, се очекува деновиве да стартуваат и оперативните зафати за катаракта или народски позната како перде.

Коронавирус