сабота, 21. јули 2018. Вести денес: 38
home Вести

Одреден притвор за градоначалникот на Ново Село, шверцувал цигари со членови на семејството

Одреден притвор за градоначалникот на Ново Село, шверцувал цигари со членови на семејството

Судија во претходна постапка во Основниот суд во Струмица му одреди мерка осумдневен притвор на градоначалникот на Ново Село, Боро Стојчев.

Истата мерка им е одредена и на останатите три лица, а на едно лице му е одземена патната исправа и треба еднаш неделно да се јавува во Судот во Струмица.

Стојчев, вчера бил уапсен откако полицијата пресретнала две моторни возила натоварени со кутии со цигари.

Од СВР Струмица соопштија дека во едното возило имало 29, а во другото 49 кутии со по 50 штеки цигари. Едното возило го управувал токму градоначалникот на Ново Село, додека во другото возел 24-годишниот Г.С., кој е во роднинска врска со Стојчев.

ОЈО Струмица поведе постапка против пет лица за сторено кривично дело Криумчарење од чл.278 ст. 2 во врска со ст. 1 во врска со чл.22 од Кривичниот законик, соопштуваат од таму, откако МВР информираше дека е спроведена акција во која е приведен и градоначалникот на Ново Село, Боро Стојчев.

Се проценува дека вредноста на цигарите кои биле запленети на див премин меѓу Македонија и Бугарија, изнесува 3.245.589 денари.

За ова кривично дело е предвидена затворска казна од шест месеци до пет години.