вторник, 12. ноември 2019. Вести денес: 149
home Вести

Македонската пејачка во 2002 загинала една недела пред трагедијата во Ласкарци: Ова се познатите Македонци- жртви на асфалтот (ФОТО)

Македонската пејачка во 2002 загинала една недела пред трагедијата во Ласкарци: Ова се познатите Македонци- жртви на асфалтот (ФОТО)

Ова се познати Македонци кои за жал беа жртви на асфалтот…

Замина Сашка Петковска, песните останаа…

Постарите раскажуваат, помладите слушаат за дамата со прекрасен глас, Сашка Петковска.

Загинала на триесет и двегодишна возраст, во сообраќајна несреќа на 31 август 1983 година, патувајќи на концерт во Свети Николе. Зад себе ги остави сопругот Марио Липша и двете ќерки. Во кобната сообраќајка загинаа и тројца члена на групата „Авона“ – Вељко, кој тогаш имаше 26 години, Петранка имаше 27, а Евдокија 23 години. Времето не им се погоди, врнежливо и студено. Дали поради грешка на возачот или лизгавиот пат, автобусот со кој патуваа излета од патот и се преврти.

Тројца политичари загинаа во 90-тите години

Во самостојна Македонија, на 19 декември 1991 година ударна вест беше загинувањето на Јордан Мијалков, првиот министер за внатрешни работи во првата македонска влада. Веста се прошири брзо – на 1,5 километар пред Бујановац на патот кон Врање во сообраќајна несреќа загина Мијалков. До несреќата дошло при претекнување во услови на голомразица, при што „мерцедесот“, кој бил управуван од возачот на Мијалков, со 180 километри на час првин удрил во банкината, а потоа „полетал“. Од другата страна во негова насока се движела „лада“  управувана од Албанец, кој ги возел своите четири деца. Мијалков патувал во Белград, а повод за шпекулациите дека бил ликвидиран е најден во фактот што тоа се случувало еден ден пред Македонија да го објави барањето за независност. Непосредно пред смртта Мијалков примил делегација на југословенското разузнавање – КОС, но се тврдеше дека средбата поминала во пријателска атмосфера.

Во сообраќајна незгода загина и Горан Николовски, некогашен претседател на градското собрание. Сообраќајната несреќа се случи во 1995 година пред Матка. Во превртениот автомобил животот го загуби Николовски, преживеа девојката што била со него. Излегоа многу шпекулации и за неговата смрт.

И министерот од редовите на ЛДП, Радован Стојковски, загина во сообраќајна несреќа. Норвешкиот капетан во КФОР, Один Кристијан Вестли, беше главен виновник за тешката сообраќајна несреќа на 28 август 1999 година кај Катланово, во која, покрај министерот, животот го загубија и неговата сопруга и ќерката, како и возачот на владиното „ауди“. Капетанот беше осуден со условна казна во неговата родна земја. Врховниот суд во Норвешка, решавајќи за жалба што ја вложил норвешкиот обвинител што го водел случајот, ја потврди првостепената пресуда, со која Вестли е казнет на шест месеци затвор за убиство од небрежност во сообраќајна несреќа. Норвешкиот капетан Вестли, возејќи во спротивен правец од дозволениот на патот Скопје – Велес директно удрил во службениот автомобил на тогашниот министер Стојковски.

Мето, Котевски, Даниел, Љуц…

Во 2000 година замина Методија Веновски-Мето, атлетски тренер и спортски работник. Кобниот ден со репрезентацијата на Македони- ја патуваше на Балканското првенство во сала во Атина.

Дванаесетти ноември 2001 година, 9 часот наутро, на патот Прилеп – Скопје, во непосредна близина на каменоломот, кај селото Тројаци, се случи тешка сообраќајна несреќа, во која животот го загуби пратеникот во Републичкото собрание Ѓорѓи Котевски од Битола, член на ВМРО-ДПМНЕ. Во автомобилот беше со неговата сопартијка Весна Јовановска, која беше тешко повредена. До несреќата дошло во моментот кога Котевски, управувајќи го својот автомобил „сеад толедо“, од засега непознати причини загубил контрола над управувачот, излетал од патот и удрил во карпа. Од силниот удар, „толедото“ се превртело и на превртеното возило налетал камион кој директно удрил во автомобилот. Од директниот удар, Котевски добил тешки повреди и починал на самото место.

На 3 февруари 2002 година, во приквечерината, познатата пејачка загина во сообраќајна несреќа во центарот на Скопје. Пред несреќата, таа била во МРТВ за да ја направи студиската снимка на песната што требало да ја изведува на престојниот фестивал “ГОЦЕ ФЕСТ”. Таа е воедно и нејзината последна снимена песна.

Петранка Костадинова важеше за една од најдобрите интерпретаторки на старите народни песни и не без причина го носеше епитетот доајен на македонската народна музика. Многу песни се испеани во нејзината 35 години долга кариера, а во последно време Костадинова често настапуваше на фестивали каде што се негуваше македонскиот фолклор.

Септемвриско утро во 2004 година. На новинарите таа среда им почна со веста дека нивниот колега Даниел Михајловски доживеал тешка сообраќајна несреќа. Молитвите за спас на Даниел траеја неколку дена. Веќе во петокот се прошири веста дека им подлегнал на повредите. Дваесет и осумгодишниот уредник на некогашниот неделник „Ритам“, кој излегуваше во рамките на тогашниот весник „Време“, доживеа сообраќајна несреќа на крстосницата на булеварот „Партизански одреди“ и улицата „Московска“ во Скопје. При судирот на „дачија“, во која се возел штипјанецот Михајловски, и на такси-возило „лада“ потешко беа повредени уште четири лица. Вечерта го прославувал раѓањето на новиот член во неговото семејство.

Први октомври 2005 година светот го напушти Зоран Костадиновски, познат како Љуц, сопственик на кафеаната „Љуц“. Загина во сообраќајна несреќа на магистралниот пат Делчево – Штип. Џипот „ландровер“ со кој тој управувал се судри со кумановски камион „даф“. Загина и сопатникот на Љуц, дваесетгодишниот Раде Темелков.

Замина и Тоше, хитовите сè уште се пеат

На 16 октомври 2007 година одекна и веста дека загинал Тоше Проески. Сите со доза неверување и со надеж дека некој повторно измислува приказни за македонската поп-ѕвезда ја примија веста дека Тоше загинал во сообраќајна несреќа во Хрватска. За жал, овој пат не беше измислена приказна. Загина во сообраќајна несреќа на два километра од клучката кај Нова Градишка, при судир на неговиот „фолксваген туарег“ и камион. Во возилото, освен Проески, кој спиел на совозачкото седиште, биле и менаџерката Лилјана Петровиќ и Ѓорѓе Ѓорѓески, кој управувал со возилото.
Возилото во кое бил Тоше удрило во приколката на камионот, по што завршил во тревната површина. Подоцна Ѓорѓе беше осуден на две години затвор поради непочитување на сообраќајните правила, возење со недозволена брзина и недоволно растојание меѓу возилата.

Веста за Тоше ја објавија и светските медиуми, меѓу кои „Би-Би-Си“ и „Си-Ен-Ен“ нарекувајќи го македонскиот Елвис Присли. Земјите од поранешна Југославија жалеа и сè уште жалат за прераното заминување на човекот со ангелски глас.

Август 2011 година – загина Љупчо Митрушев, познат како диџеј Пауер, враќајќи се од Крива Паланка. Митрушев бил сопатник во во- зилото кое излетало од патот и удрило во бетонски столб.

Смртта за македонскиот диџеј Љупчо Митрушев ја погоди поголем дел од јавноста бидејќи тој беше познат меѓу луѓето, почитуван и поддржуван во својата работа. Успешно ги забавуваше луѓето и имаше многубројни настапи во македонските дискотеки и кафулиња.

Големото новинарско перо

Среда напладне. Се слушна дека новинарот и сопственик на „Фокус“, Никола Младенов, доживеал сообраќајна несреќа. Сознанијата одат до најлошото. Надеж дека, сепак, се работи за мала сообраќајна несреќа. За жал, фотографот на „Република“ стигна до местото и испрати фотографија од превртениот автомобил на Младенов. Беше јасно. Веста е точна. Целосно точна. Младенов направил сообраќајка на автопатот Велес – Скопје, во близина на Хиподром. „Мерцедесот“ со кој управувал излетал од патот и се превртел. Сè се случувало доцна вечерта во вторникот. Го пронајдоа следниот ден напладне. Новинарите не можеа и не сакаа да поверуваат во вистинитоста на веста која требаше да ја пренесат. Не сакаа да поверуваат ниту голем дел од читателите. Новинарското перо замина прерано, само што наполни 49. Се шпекулира дека возел со 150 километри на час, дека три часа се возел по истата делница. Но, официјалните причини сè уште се непознати.

Ова се само дел од познатите Македонци што загинале во сообраќајни несреќи. Најчесто причините се неприспособена брзина, лизгав коловоз…