среда, 20. октомври 2021. Вести денес: 156
home Вести

Додека македонскиот јазик станува балканско есперанто, Димитров не ги осудува Бугарите

Додека македонскиот јазик станува балканско есперанто, Димитров не ги осудува Бугарите

Се уште молк од страна на министерот за надворешни работи Никола Димитров, по навредите за македонскиот јазик кој според бугарскиот вицепремиер Красимир Каракачанов е „балканско есперанто“.

Каракачанов вчера во гостување на бугарската телевизија БТВ вчера изјави дека македонската нација е создадена во 1994 година, а на прашање дали има македонски јазик – тој рече „тој јазик всушност е едно балканско есперанто, српски зборови, турски зборови на основа на западнобугарскиот дијалект. Како сакаат можат да го наречат. За науката и за мене, тоа е бугарски јазик, бугарски дијалект“.

Вчеравечер извори на „360 степени“ од Берлин објавија за бурно попладне и бурна вечер на состанокот меѓу Димитров, Бујар Османи и шефицата на бугарската дипломатија Катарина Захариева, кои како што велат со посредство на германски министри за надворешни работи и Европа се барало решение за бугарските позиции во однос на предло-преговарачката рамка што ја изготви германското претседателство со Советот на ЕУ.

Очигледно синоќа се пеглало именувањето на „јазикот“ во Рамката, но и во другите документи на ЕУ во иднина и се барало начин како да бидат задоволени и двете страни.

Но, што пеглаа синоќа во Берлин Димитров и Османи сеуште македонските граѓани не знаат. Димитров остана имун на навредите од страна на Каракачанов, дека македонскиот јазик е балканско есперанто, па ни трага ни глас за тоа што се преговара со германските претставници и Захариева.

На гостување вчеравечер лидерот на ВМРО-ДПМНЕ, Христијан Мицкоски му порача пак на Каракачанов да го прочита Блаже Конески, затоа што како што вели има што да научи за македонскиот јазик.

Дополнително ВМРО-ДПМНЕ уште мината година побара македонското собранието да донесе резолуција во однос на македонскиот јазик за одбрана од бугарските провокации, а партијата Левица пак деновиве бара итно ставање на дневен ред на декларација за осуда на бугарските национал-шовинистички претензии.

Провокациите од страна на Бугарија се очигледни, а и реториката на нивните претставници е засилена во насока на нивните барања, и иако опозициските партии бараат од власта став и осуда за таквите бугарски ставови, од Владата сеуште молк и нетранспаретност во однос на разговорите кои ги водат со бугарските претставници, а и никој од владините претставници не се огласи со осуда за ваквата реторика на Бугарија, ниту во одбрана на македонските црвени линии за јазикот.

Најнови вести

Локални избори 2021