петок, 13. декември 2019. Вести денес: 0
home Вести

Белгискиот парламент го одобри пристапниот протокол за НАТО

Белгискиот парламент го одобри пристапниот протокол за НАТО

Белгискиот федерален парламент денеска го одобри пристапниот протокол на Македонија во НАТО, јави дописничката на МИА од Брисел.

Информацијата ја соопшти белгискиот министер за надворешни работи, Дидие Рејндерс на Твитер.

-Задоволство ми е да соопштам дека белгискиот парламент денеска го одобри законот со кој се прифаќа пристапниот протокол на Република Македонија во НАТО, Белгија е на чекор да го финализира процесот на ратификација, напиша Рејндерс.

Предлог законот за пристапувањето на Македонија во Алијансата беше одобрен од страна на белгиската влада пред помалку од две недели.

Белгиската процедура предвидува прво законот да добие зелено светло од Државниот совет, чие мислење иако не е обврзувачко е многу важно, потоа законот да го одобри Парламентот пред да биде ратификуван. Другите регионални парламенти не се инволвирани во процесот, само федералниот, што значително ја забрзува процедурата.