четврток, 24. септември 2020. Вести денес: 178
home Култура

Изложба на дизајни за Кинотеката изработени од Ладислав Цветковски

Изложба на дизајни за Кинотеката изработени од Ладислав Цветковски

Изложба на дел од дизајни што уметникот Ладислав Цветковски ги изработил за потребите на Кинотеката ќе биде отворена во нејзината галерија вечер од 19 часот, со што ќе бидат одбележани 28 години од соработката на уметникот со оваа институција.

Графичкиот дизајнер и визуелен уметник Цветковски, кој е и универзитетски професор, изработил дизајнерски решенија за повеќе од 150 печатени изданија на Кинотеката: плакати, филмски програми, брошури, каталози, други периодични изданија, книги,  ДВД-изданија.

Изработил и печатени материјали за ИФФК „Браќа Манаки“, кога Кинотеката беше организатор на фестивалот, како и комплетното брендирање и осмислување на визуелниот идентитет на 70-тиот Конгрес на Меѓународната федерација на филмски архиви (ФИАФ) кој во организација на Кинотеката се одржа во Скопје во 2014 година. 

– Речиси три децении постои и се одржува креативната соработка помеѓу Цветковски и оваа институција од културата – почнувајќи од третиот број на  списанието за историја, теорија и и култура на филмот „Кинопис“ во 1991 година, па сè до 56-тото, последно издание на списанието во 2019 година, соопшти Кинотеката за изложбата која ќе може да се посети до 15 јануари 2020. 

Во своето работно искуство Цветковски ги истражува изразните можности на електронските медиуми во уметноста и теоријата на боја, фокусирајќи се на употребата на дигиталната технологија во ликовната уметност.  Во последните неколку години основен ликовен јазик што го користи е социјалниот плакат, преку кој ги коментира актуелните политички случувања.

Коронавирус