Регион

Пожар во фабрика: Над Јагодина се крева густ чад

Пожар избувна денеска во кинеската фабрика за производство на влечки „Лианхе“ во српскиот град Јагодина, јави телевизија Б92.

 

Во изјава за телевизијата, претседателот на општинското Собрание на Јагодина, Драган Марковиќ- Палма нагласи дека сите работници се на време евакуирани од фабриката и дека при пожарот нема повредени.

Се претпоставува дека пожарот во фабриката, која е отворена пред шест месеци, избувнал поради неисправна инсталација.

Претставник на противпожарната единица изјави дека пожарот го зафатил призводниот погон на фабриката и дека „горат репроматеријали, машини, гума и лепак“.

Поради високите температури и густиот чад пожарникарите не можат да влезат во фабричкиот погон, туку пожарот го гаснат однадвор со пена и вода.

Во гаснењето на огнот учествуваат четири противпожарни возила од Јагодина, а најавено е пристигнување и на дополнителни пожарникари од Ќуприја и Параќин.

Над Јагодина се крева густ чад, кој според пожарникарите, „предизвикува задушување“, па на жителите им е препорачано да ги затворат прозорците на своите домови.