недела, 27. мај 2018. Вести денес: 79
home Скопје

Шилегов ќе потроши 14.000 евра да си го измери рејтингот

Шилегов ќе потроши 14.000 евра да си го измери рејтингот

По само 100 дена откако е на власт, градоначалникот Петре Шилегов одлучи да си го измери рејтингот. Град Скопје објави оглас за анкети за истражување на јавното мислење. Од Градот процениле дека за таа намена ќе потрошат околу 14.000 евра. Во огласот е наведено дека се бара субјект кој ќе изврши осум квантитативни истражувања на пазарот, преку кои ќе се обезбедат резултати за јавното мислење во однос на градските политики.

Се бара тие да бидат направени на репрезентативен примерок од најмалку 1000 испитаници на територија на Град Скопје. Истражувањата треба да се спроведат во рок од една година.

„Цел на истражувањето на пазарот е да го истражи мислењето на граѓаните на Град Скопје во однос на градските проблеми и политики, како и да овозможи квантитативно толкување низ одредена временска рамка”, стои во објавениот оглас.

Обврска на избраниот субјект ќе биде истражувањето да го направи во рок од една година, да спроведе осум телефонски истражувања на стратифициран примерок со минимум 1000 испитаници, репрезентативен за жителите на Град Скопје на возраст над 18 години. Прашањата кои ќе им бидат поставувани на анкетираните, ќе бидат изработени од страна на градските служби.

Инаку, изминатиов викенд скопскиот градоначалник даде отчет за сработеното во првите 100 дена откако е на чело на главниот град. Меѓудругото, набројувајќи ги започнатите проекти, оцени дека првите 100 дена новата градска власт работела посветено, одговорно и чесно, следејќи ги потребите и интересите на граѓаните на Скопје.